Friday 21 February 2020

एक डोल पानी तो भर द / कवि - अस्मुरारी नंदन मिश्र

कविता
मातृभाषा दिवस के अवसर पर 

(मुख्य पेज देखS- https://bejodindia.blogspot.com/ हर 12 घंटा पर देखSFB+  Bejod India)


मिठका कुइयाँ भीड़
एक डोल पानी तो भर द
कोय माँगे गंगा, कोय चाहे जमजम
कोय-कोय अमरित ले साँस लेवे थमथम
हमनी के एही सब नीर
एक डोल पानी तो भर द

मिट्ठा तो एकर ऐसन है पानी
चीनी घोरल जैसन मगही बानी
अदरा के जैसन खीर
एक डोल पानी तो भर द

जेठ के दोपहरी में तरल-तरावट
पूस के भोरवा में भाप गरमाहट
औरे दिन मन के मीर
एक डोल पानी तो भर द

ओकरे से पुजा होवे ओकरे से सुद्धी
हमनी के ओकरे से जुड़ल चौहद्दी
ओकरे से बल और बीर
एक डोल पानी तो भर द

देवाली-देवाली में दीया जलैलूँ
छठवा में ओकरे में अरघ चढ़ैलूँ
होलिए में ओहिजे भीड़
एक डोल पानी तो भर द

एक डोल घरे ले एक डोल दूरा
गइया के नाद में एक डोल पूरा
एक डोल साधू-फकीर
एक डोल पानी तो भर द

चाहे डोले धरती चाहे आवे परलय
चाहे धूरी-धक्कड़ में सब हो जाय लय
एकरा में बचल रहे नीर
एक‌‌ डोल‌ पानी तो भर द
.....

कवि - अस्मुरारी नंदन मिश
प्रतिक्रिया हेतु ब्लॉग के ईमेल - editorbejodindia@gmail.com







No comments:

Post a Comment