हेलते अगहन बियाह के धमस सुनाय परे लगलय।कल्हे संझिया के घर घुसते उ कहे लगलखीं लगन सुरू हो गेलो। सुन टलही बियाह के गीत।हमहूं सुनिये रहलिये हs।
बियाह के नाम सुन सबके मुंह चमचमाय लग हय। चाहे बियाह होला केतनो दिन हो जाय। फेसबुक पर एगो पोस्ट पढ़लिय जेकरा में उ अपन बियाह के अंठाबनवां सालगिरह में सज-धज के दुल्हा दुल्हिन बनल हलखीं।
आझो उनखर पोस्ट में उहे जोश देखाय पड़लय सायत जैसन उ बियाह घड़ी मसूस कैलखिन होत। अगहन सुरू होते दरजी के दोकान पर धमकुचड़ी होवे लग हय।सब के बियाह में जाय लगी नयका कपड़ा चाही।
जब जाय बला के एतना जोश रहय त बताब जेकर बियाह होतय ओकर कि हाल होतय। रोशनियां के भी बियाह होबे बला हय।ओकर बाउजी किसान हखीं।हाली हाली धान समेटे के कोशिश में लगल हंखी।एकदने लगौनी हय दाल दलहन के सरसों राय के आउ गेहूं के भी।उपर से रोशनियां के बियाह के करसामा।
रोशनियां के बाउजी सोंच लेलखिन्ह की एमकी कुल्हे धान खेरहनिये से बेच देबय।आउ रोशनियां के बियाह खूब धूमधाम से करबय।बाकि धान कटलो पर कोय पिटे बला नय मिल रहले ह। सब रब्बि लगाबे में व्यस्त हय।
जवनकन सब सहरे चल गेलय।कोय नय खेती में कमाय ल चाह हय।रोशनायां के बाउजी के चिंता सता रहले ह कि लड़का बला कहलखिन की अगहन में बियाह होतो।
अब चिंता इहो बढ़ गेलय कि धान पिटलो पर बिकतय नय तब कि होतय। अभी कोय खबर नय हय कि सरकार धान लेतय कि नय।रोशनियां के बाउजी बड़गो किसान हखीं।अभियो तीस चालीस बिगहा खेत हय। बाकि उनका से जादे ठाट बाट में उनके गांव के गुड्स गार्ड रह हय।
जब जब रोशनियां के बाउजी बड़गो खेतिहर होबे के गुमान में डूबे लग हखीं, रोशनियां उहे गुड्स गार्ड के कहानी छेड़ देहय।कहे लग हय कैसे उ अप्पन बाल बुतरु के बढ़ियां इसकूल में पढ़ैलखिन। बाउजी हमरो ओइसने इसकुल में पढ़ैत हल त हमहूं कुछ करे लायक बनतीये हल।
रोशनियां के बाउजी के कोय जबाव नय सुझै।मनेमन सोचे लग हखीं कि पढ़ल लिखल बेटी रहते हल त आज लड़का बला के मनमानी नय चलते हल।आउ दहेज लगी हमरा एतना माथा नय पीटे पड़ते हल।
हमहूं तो चाहबे कर हलिय कि रोशनियां के अफसर बनैइय रोशनियां भी पढ़े में तेज हलय बाकि बेटा के पढ़ाबे के मोह रोशनियां ऐसहीं रह गेलय।खेत में एतना आमदनी नय हलय कि रोशनियां के होस्टल में भेज सकहलिय।
गाम में बढ़ियां इसकूल कहां हलय जहिना।
अगहन हेल गेलय पैसा के इंतजाम नय हो रहले ह। कैसे होतय रोशनियां के बियाह।
(............क्रमश:)...
लिखताहर - लता प्रासर
